Sri Srisaila Mallikarjuna Suprabhatam

prātassmarāmi gaṇanāthamanāthabandhuṃ sindūrapūrapariśōbhitagaṇḍayugmam । uddaṇḍavighnaparikhaṇḍanachaṇḍadaṇḍa- mākhaṇḍalādisuranāyakavṛndavandyam ॥ 1॥

kalābhyāṃ chūḍālaṅkṛtaśaśikalābhyāṃ nijatapaḥ phalābhyāṃ bhaktēṣu prakaṭitaphalābhyāṃ bhavatu mē । śivābhyāmāstīkatribhuvanaśivābhyāṃ hṛdi puna- rbhavābhyāmānandasphuradanubhavābhyāṃ natiriyam ॥ 2॥

namastē namastē mahādēva! śambhō! namastē namastē dayāpūrṇasindhō! namastē namastē prapannātmabandhō! namastē namastē namastē mahēśa ॥ 3॥

śaśvachChrīgirimūrdhani trijagatāṃ rakṣākṛtau lakṣitāṃ sākṣādakṣatasatkaṭākṣasaraṇiśrīmatsudhāvarṣiṇīm । sōmārdhāṅkitamastakāṃ praṇamatāṃ nissīmasampatpradāṃ suślōkāṃ bhramarāmbikāṃ smitamukhīṃ śambhōssakhīṃ tvāṃ stumaḥ ॥ 4॥

mātaḥ! prasīda, sadayā bhava, bhavyaśīlē ! līlālavākulitadaityakulāpahārē ! śrīchakrarājanilayē ! śrutigītakīrtē ! śrīśailanāthadayitē ! tava suprabhātam ॥ 5॥

śambhō ! surēndranuta ! śaṅkara ! śūlapāṇē ! chandrāvataṃsa ! śiva ! śarva ! pinākapāṇē ! gaṅgādhara ! kratupatē ! garuḍadhvajāpta ! śrīmallikārjuna vibhō ! tava suprabhātam ॥ 6॥

viśvēśa ! viśvajanasēvita ! viśvamūrtē ! viśvambhara ! tripurabhēdana ! viśvayōnē ! phālākṣa ! bhavyaguṇa ! bhōgivibhūṣaṇēśa ! śrīmallikārjuna vibhō ! tava suprabhātam ॥ 7॥

kalyāṇarūpa ! karuṇākara ! kālakaṇṭha ! kalpadrumaprasavapūjita ! kāmadāyin ! durnītidaityadalanōdyata ! dēva dēva ! śrīmallikārjuna vibhō ! tava suprabhātam ॥ 8॥

gaurīmanōhara ! gaṇēśvarasēvitāṅghrē ! gandharvayakṣasurakinnaragītakīrtē ! gaṇḍāvalambiphaṇikuṇḍalamaṇḍitāsya ! śrīmallikārjuna vibhō ! tava suprabhātam ॥ 9॥

nāgēndrabhūṣaṇa ! nirīhita ! nirvikāra ! nirmāya ! niśchala ! nirargala ! nāgabhēdin । nārāyaṇīpriya ! natēṣṭada ! nirmalātman ! śrīparvatādhipa ! vibhō ! tava suprabhātam ॥ 10॥

sṛṣṭaṃ tvayaiva jagadētadaśēṣamīśa ! rakṣāvidhiścha vidhigōchara ! tāvakīnaḥ । saṃhāraśaktirapi śaṅkara ! kiṅkarī tē śrīśailaśēkhara vibhō ! tava suprabhātam ॥ 11॥

ēkastvamēva bahudhā bhava ! bhāsi lōkē niśśaṅkadhīrvṛṣabhakētana ! mallinātha ! śrībhrāmarīpraya ! sukhāśraya ! lōkanātha ! śrīśailaśēkhara vibhō ! tava suprabhātam ॥ 12॥

pātālagāṅgajalamajjananirmalāṅgāḥ bhasmatripuṇḍrasamalaṅkṛtaphālabhāgāḥ । gāyanti dēvamunibhaktajanā bhavantaṃ śrīmallikārjuna vibhō ! tava suprabhātam ॥ 13॥

sārasvatāmbuyutabhōgavatīśritāyāḥ brahmēśaviṣṇugirichumbitakṛṣṇavēṇyāḥ । sōpānamārgamadhiruhya bhajanti bhaktāḥ śrīmallikārjuna vibhō ! tava suprabhātam ॥ 14॥

śrīmallikārjunamahēśvarasuprabhāta- stōtraṃ paṭhanti bhuvi yē manujāḥ prabhātē । tē sarva saukhyamanubhūya parānavāpyaṃ śrīśāmbhavaṃ padamavāpya mudaṃ labhantē ॥ 15॥

iti śrīmallikārjunasuprabhātaṃ sampūrṇam ।