Sri Shashti Devi Stotram

stōtram |

namō dēvyai mahādēvyai siddhyai śāntyai namō namaḥ | śubhāyai dēvasēnāyai ṣaṣṭhīdēvyai namō namaḥ || 1 ||

varadāyai putradāyai dhanadāyai namō namaḥ | sukhadāyai mōkṣadāyai ṣaṣṭhīdēvyai namō namaḥ || 2 ||

sr̥ṣṭyai ṣaṣṭhāṁśarūpāyai siddhāyai ca namō namaḥ | māyāyai siddhayōginyai ṣaṣṭhīdēvyai namō namaḥ || 3 ||

sārāyai śāradāyai ca parādēvyai namō namaḥ | bālādhiṣṭātr̥dēvyai ca ṣaṣṭhīdēvyai namō namaḥ || 4 ||

kalyāṇadāyai kalyāṇyai phaladāyai ca karmaṇām | pratyakṣāyai sarvabhaktānāṁ ṣaṣṭhīdēvyai namō namaḥ || 5 ||

pūjyāyai skandakāntāyai sarvēṣāṁ sarvakarmasu | dēvarakṣaṇakāriṇyai ṣaṣṭhīdēvyai namō namaḥ || 6 ||

śuddhasattvasvarūpāyai vanditāyai nr̥ṇāṁ sadā | hiṁsākrōdhavarjitāyai ṣaṣṭhīdēvyai namō namaḥ || 7 ||

dhanaṁ dēhi priyāṁ dēhi putraṁ dēhi surēśvari | mānaṁ dēhi jayaṁ dēhi dviṣō jahi mahēśvari || 8 ||

dharmaṁ dēhi yaśō dēhi ṣaṣṭhīdēvī namō namaḥ | dēhi bhūmiṁ prajāṁ dēhi vidyāṁ dēhi supūjitē | kalyāṇaṁ ca jayaṁ dēhi ṣaṣṭhīdēvyai namō namaḥ || 9 ||

iti śrī ṣaṣṭhīdēvi stōtram |