ధ్యానం
ధ్యాయేన్నిత్యం మహేశం రజతగిరినిభం చారుచంద్రావతంసం
రత్నాకల్పోజ్జ్వలాంగం పరశుమృగవరాభీతిహస్తం ప్రసన్నం
పద్మాసీనం సమంతాత్స్తుతమమరగణైర్వ్యాఘ్రకృత్తిం వసానం
విశ్వాద్యం విశ్వబీజం నిఖిలభయహరం పంచవక్త్రం త్రినేత్రం

అథ స్తోత్రం

పశుపతీందుపతిం ధరణీపతిం భుజగలోకపతిం చ సతీపతిం
ప్రణతభక్తజనార్తిహరం పరం భజత రే మనుజా గిరిజాపతిం

న జనకో జననీ న చ సోదరో న తనయో న చ భూరిబలం కులం .
అవతి కోఽపి న కాలవశం గతం భజత రే మనుజా గిరిజాపతిం

మురజడిండిమవాద్యవిలక్షణం మధురపంచమనాదవిశారదం
ప్రమథభూతగణైరపి సేవితం భజత రే మనుజా గిరిజాపతిం

శరణదం సుఖదం శరణాన్వితం శివ శివేతి శివేతి నతం నృణాం
అభయదం కరుణావరుణాలయం భజత రే మనుజా గిరిజాపతిం

నరశిరోరచితం మణికుండలం భుజగహారముదం వృషభధ్వజం
చితిరజోధవలీకృతవిగ్రహం భజత రే మనుజా గిరిజాపతిం

మఖవినాశకరం శశిశేఖరం సతతమధ్వరభాజిఫలప్రదం
ప్రలయదగ్ధసురాసురమానవం భజత రే మనుజా గిరిజాపతిం

మదమపాస్య చిరం హృది సంస్థితం మరణజన్మజరాభయపీడితం
జగదుదీక్ష్య సమీపభయాకులం భజత రే మనుజా గిరిజాపతిం

హరివిరంచిసురాధిపపూజితం యమజనేశధనేశనమస్కృతం
త్రినయనం భువనత్రితయాధిపం భజత రే మనుజా గిరిజాపతిం

పశుపతేరిదమష్టకమద్భుతం విరచితం పృథివీపతిసూరిణా
పఠతి సంశృణుతే మనుజః సదా శివపురీం వసతే లభతే ముదం

ఇతి శ్రీపశుపత్యష్టకం సంపూర్ణం