శ్రీ విష్ణు షట్పదీ స్తోత్రం

అవినయమపనయ విష్ణో దమయ మనః శమయ విషయమృగతృష్ణామ్ | భూతదయాం విస్తారయ తారయ సంసారసాగరతః || ౧ ||

దివ్యధునీమకరందే పరిమళపరిభోగసచ్చిదానందే | శ్రీపతిపదారవిందే భవభయఖేదచ్ఛిదే వందే || ౨ ||

సత్యపి భేదాపగమే నాథ తవాఽహం న మామకీనస్త్వం | సాముద్రో హి తరంగః క్వచన సముద్రో న తారంగః || ౩ ||

ఉద్ధృతనగ నగభిదనుజ దనుజకులామిత్ర మిత్రశశిదృష్టే | దృష్టే భవతి ప్రభవతి న భవతి కిం భవతిరస్కారః || ౪ ||

మత్స్యాదిభిరవతారైరవతారవతాఽవతా సదా వసుధాం | పరమేశ్వర పరిపాల్యో భవతా భవతాపభీతోఽహం || ౫ ||

దామోదర గుణమందిర సుందరవదనారవింద గోవింద | భవజలధిమథనమందర పరమం దరమపనయ త్వం మే || ౬ ||

నారాయణ కరుణామయ శరణం కరవాణి తావకౌ చరణౌ | ఇతి షట్పదీ మదీయే వదనసరోజే సదా వసతు || ౭ ||

ఇతి శ్రీ శంకర భగవత్పాద కృతం షట్పది స్తోత్రం సంపూర్ణం |