ఈ శ్లోకం విని జగద్గురువు ఆది శంకరాచార్య ఆశీస్సులు పొందండి

ఆనందగిరి విరచిత తోటకాష్టకం

విదితాఖిలశాస్త్రసుధాజలధే మహితోపనిషత్ కథితార్థనిధే | హృదయే కలయే విమలం చరణం భవ శంకర దేశిక మే శరణమ్ || ౧ ||

కరుణావరుణాలయ పాలయ మాం భవసాగరదుఃఖవిదూనహృదమ్ | రచయాఖిలదర్శనతత్త్వవిదం భవ శంకర దేశిక మే శరణమ్ || ౨ ||

భవతా జనతా సుహితా భవితా నిజబోధవిచారణ చారుమతే | కలయేశ్వరజీవవివేకవిదం భవ శంకర దేశిక మే శరణమ్ || ౩ ||

భవ ఏవ భవానితి మే నితరాం సమజాయత చేతసి కౌతుకితా | మమ వారయ మోహమహాజలధిం భవ శంకర దేశిక మే శరణం || ౪ ||

సుకృతేఽధికృతే బహుధా భవతో భవితా సమదర్శనలాలసతా | అతిదీనమిమం పరిపాలయ మాం భవ శంకర దేశిక మే శరణమ్ || ౫ ||

జగతీమవితుం కలితాకృతయో విచరంతి మహామహసశ్ఛలతః | అహిమాంశురివాత్ర విభాసి గురో భవ శంకర దేశిక మే శరణమ్ || ౬ ||

గురుపుంగవ పుంగవకేతన తే సమతామయతాం నహి కోఽపి సుధీః | శరణాగతవత్సల తత్త్వనిధే భవ శంకర దేశిక మే శరణమ్ || ౭ ||

విదితా న మయా విశదైకకలా న చ కించన కాంచనమస్తి గురో | ద్రుతమేవ విధేహి కృపాం సహజాం భవ శంకర దేశిక మే శరణమ్ || ౮ ||

ఇతి ఆనందగిరి విరచిత తోటకాష్టకం సంపూర్ణం |